សមត្ថកិច្ច កំពុងស្វែងរកម្ចាស់ក្របី១ក្បាល ដេញវ័ធមនុស្សរបួសធ្ងន់ស្រាល៦នាក់ នៅក្រុងប៉ោយប៉ែត
ខេត្តបន្ទាយមានជ័យ ៖ យ៉ាងហោចណាស់មានមនុស្សចំនួន ៦នាក់ (ស្រីចំនួន៣នាក់) បានរងរបួសធ្ងន់ស្រាល ដោយសារសត្វក្របីឡើង ក មួយក្បាល បានរត់ប្រសាចតាមទីសារធារណៈដេញវ័ធ មនុស្សម្នាធ្វើដំណើរតាមផ្លូវ កាលពីម៉ោងប្រមាណជាង ១០ព្រឹកថ្ងៃទី១២ ខែមិថុនា ឆ្នាំ២០២៣ នៅភូមិផ្សារកណ្ដាល ក្រុងប៉ោយប៉ែត។
សមត្ថកិច្ចនគរបាលមូលដ្ឋាន បានឲ្យដឹងថា មានជនរងគ្រោះ ប្រុសស្រីចំនួន ២នាក់ បានរងរបួសធ្ងន់ ដោយសារក្របីវ័ធ។ ហើយ ជនរងគ្រោះទី១ មានឈ្មោះ ហង្ស ខៀវ ភេទប្រុស អាយុ ៤៨ឆ្នាំ នៅភូមិគីឡូត៌ម៉ែត្រ៤ សង្កាត់ផ្សារកណ្ដាល ក្រុងប៉ោយប៉ែត និងជនរងគ្រោះ ទី២-ឈ្មោះ សុវណ្ណ ស្រីលាក់ ភេទស្រី អាយុ ៣៧ឆ្នាំ មុខរបរលក់បាយ មានស្រុកកំណើតនៅ ខេត្តបាត់ដំបង ។ ក្នុងនោះមានម៉ូតូមួយចំនួន ក៏ត្រូវក្របីមួយក្បាលនេះ វ័ធ បណ្ដាលឲ្យរងការខូចខាតផងដែរ ។ ភ្លាមៗនោះ ជនរងគ្រោះ ត្រូវបានដឹកបញ្ជូនទៅព្យាបាលនៅមន្ទីពេទ្យបង្អែក ខេត្តបន្ទាយមានជ័យ។
សេចក្ដីរាយការណ៍ របស់សមត្ថកិច្ច បានឲ្យដឹងថា ក្របីឡើងកមួយក្បាល បានបោលចេញពីភូមិផ្សារកណ្ដាល ក្រុងប៉ោយប៉ែត ដោយបោល តាមបណ្ដោយផ្លូវជាតិលេខ៥ រួចចូលក្នុងផ្សារ ហើយបានបោលវ័ធ ទៅលើជនរងគ្រោះ កំពុងតែជិះម៉ូតូ បណ្ដាលឲ្យរងរបួសធ្ងន់។
ប្រភពបានបន្តថា ក្របីឡើងកមួយក្បាលនោះ បានព្យាយាមបោលដេញវ័ធអ្នកស្រុក និងអ្នកធ្វើដំណើរតាមផ្លូវមួយចំនួន តាមផ្លូវបេតុង ក្នុងក្រុងប៉ោយប៉ែត បង្កការភ្ញាក់ផ្អើលដល់សមត្ថកិច្ច និងប្រជាពលរដ្ឋផងដែរ ។
ទោះជាបែបនេះក្តី ក្របីឡើង ក មួយក្បាលនេះ ត្រូវបានសមត្ថកិច្ច និងប្រជាពលរដ្ឋ នាំគ្នាដេញតាមព័ទ្ធចាប់ ដើម្បីកុំឲ្យបោលដេញវ័ធមនុស្ស តាមផ្លូវសាធារណៈជាបន្តទៀត។
ចំពោះករណីនេះ លោកអធិការក្រុងប៉ោយប៉ែត បានបញ្ជាក់ថា ក្របីមួយក្បាលលើនេះ ត្រូវបានកម្លាំងសមត្ថកិច្ច របស់ លោក ព័ទ្ធចាប់បានហើយ ដោយប្រើពេល២ម៉ោង និងកំពុងស្វែងរកម្ចាស់ក្របី ដើម្បីឲ្យចូលខ្លួនមកដោះស្រាយ ជាមួយ ជនរងគ្រោះ និងការខូចខាតទ្រព្យសម្បត្តិ អ្នកដទៃ ៕ ប្រភព ៖ កោះសន្តិភាព
