ខេត្តព្រះសីហនុ ៖ ក្រោយមានបទបញ្ជាពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឳ្យថ្នាក់ដឹកនាំនៅតាមរាជធានី-ខេត្ត ប្រើវិធានការក្តៅបង្ក្រាប និងទប់ស្កាត់បទល្មើសក្មេងទំនើង និងបទល្មើសផ្សេងៗទៀត ឳ្យមានប្រសិទ្ធភាព រួចមក គេសង្កេតឃើញថា នៅខេត្តជាប់ឆ្នេរសមុទ្រឯណោះវិញ លោក គួច ចំរើន ប្រធានគណៈបញ្ជាការឯកភាពខេត្តព្រះសីហនុ និងជាគណៈអភិបាលខេត្តព្រះសីហនុ បានកោះប្រជុំមន្ត្រីជំនាញស្ថាប័នពាក់ព័ន្ធទាំងស៊ីវិល និងកងកម្លាំងគ្រប់ប្រភេទ ជាពិសេសបានដាក់បទបញ្ជាបន្តទៅកាន់ ថ្នាក់ដឹកនាំ នៃទីបញ្ជាការដ្ឋានកងរាជអាវុធហត្ថ និងស្នងការដ្ឋាននគរបាល ខេត្តព្រះសីហនុ ឳ្យចុះបង្ក្រាបក្រុមក្មេងទំនើង និងបទល្មើសផ្សេងៗទៀត ឳ្យមានប្រសិទ្ធភាព ខណៈបទល្មើសជាច្រើនប្រភេទ កំពុងធ្វើសកម្មភាព នាំឳ្យប៉ះពាល់ដល់សណ្តាប់ធ្នាប់សង្គម និងសុវត្ថិភាព ក្នុងការរស់នៅ របស់ប្រជាពលរដ្ឋ នៅតាមមូលដ្ឋានមួយចំនួន។
ជាក់ស្តែង កាលពីថ្ងៃទី២៥ ខែឧសភា ឆ្នាំ២០២៤ លោកឧត្តមសេនីយ៍ត្រីហេង ប៊ុនទី មេបញ្ជាការកងរាជអាវុធហត្ថព្រះសីហនុ បានឳ្យដឹងថា កម្លាំងរបស់លោក បានចុះល្បាតនិងឃាត់ខ្លួន ក្រុមយុវជន ចំនួន ០៩នាក់ ក្នុងនោះ មានជនជាតិឥណ្ឌូនេស៊ី ចំនួន ០២នាក់, ជនជាតិវៀតណាម ០២នាក់ និង ជនជាតិខ្មែរ ០៥នាក់។ ព្រមជាមួយគ្នានោះ កម្លាំងជំនាញ ក៏បានដកហូតវត្ថុតាងម៉ូតូ ចំនួន ០៦គ្រឿង ដែលបំពាក់បំពង់សុីម៉ាំងកែច្នៃ ខុសលក្ខណ:បច្ចេកទេស បង្កសំឡេងរំខាន ធ្វើឱ្យប៉ះពាល់ដល់សណ្តាប់ធ្នាប់សាធារណ: ដោយនាំយុវជនទាំងនោះ មកអប់រំណែនាំ ធ្វើកិច្ចសន្យាបញ្ឈប់សកម្មភាពនាថ្ងៃអនាគត មុននឹងអនុញ្ញាតឳ្យវិលទៅលំនៅដ្ឋានវិញ។
ចំពោះម៉ូតូ របស់ក្មេងទំនើងទាំងនោះ ត្រូវបានកម្លាំងជំនាញ នាំយកមករក្សាទុកជាបណ្តោះអាសន្ន ក្នុងទីបញ្ជាការដ្ឋាន កងរាជអាវុធហត្ថខេត្តព្រះសីហនុ រង់ចាំម្ចាស់យកបំពង់សុីម៉ាំង មកផ្លាស់ប្តូរ ឱ្បបានត្រឹមត្រូវតាមលក្ខណ:បច្ចេកទេស ទើបអនុញ្ញាតឱ្យយកត្រឡប់ទៅប្រើប្រាស់វិញ។
ត្រង់ចំណុចនេះ លោកឧត្តមសេនីយ៍ត្រី ហេង ប៊ុនទី បញ្ជាក់ថា ប្រតិបត្តិការនេះធ្វើឡើងកាលពីយប់ ថ្ងៃទី២៥ ខែឧសភា ក្នុងពេលកម្លាំងជំនាញចុះល្បាត តាមបណ្តាគោលដៅក្នុងភូមិសាស្រ្តក្រុងព្រះសីហនុ ដើម្បីស្រាវជ្រាវកំណត់មុខសញ្ញា ស្វែករកបទល្មើសបង្ការទប់ស្កាត់ បង្ក្រាបរាល់សកម្មភាព របស់ក្រុមក្មេងទំនើង តាមបទបញ្ជា របស់ ថ្នាក់ដឹកនាំគ្រប់ជាន់ថ្នាក់ ធ្វើយ៉ាងណា ផ្តល់ការរស់នៅជូនប្រជាពលរដ្ឋ ក៏ដូចជាភ្ញៀវទេសចរ ឳ្យមានសុវត្ថិភាពល្អ។
ចំណែក កាលពីថ្ងៃទី២៦ ខែឧសភា ឆ្នាំ២០២៤ កម្លាំងនគរបាលខេត្តព្រះសីហនុ ក្រោយទទួលការរាយការណ៍ពី ប្រជាពលរដ្ឋ ពាក់ព័ន្ធក្រុមក្មេងទំនើងបង្ហោះម៉ូតូ យ៉ាងអណាធិបតេយ្យ រួចមក គឺលោកឧត្ដមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ ក៏បានបញ្ជាទៅ កម្លាំងផែនការងារនគរបាលព្រហ្មទណ្ឌ ឳ្យចុះល្បាត និងតាមស្វែងរក ក្រុមក្មេងទំនើងទាំងនោះ នៅតាមដងផ្លូវនានា ក្នុងក្រុងព្រះសីហនុ រួចក៏ប្រទះឃើញក្មេងទំនើង ០១ក្រុមមានគ្នា ១២នាក់ ហើយក៏បានឃាត់ ដើម្បីសាកសួរ។
សមត្ថកិច្ចបន្តថា ក្រោយសួរនាំរួច ក្រុមក្មេងទាំងនោះ បានសារភាពថា ពិតជាបានបង្ហោះម៉ូតូពិតមែន ហើយក៏ធ្លាប់ធ្វើសកម្មភាពដូចគ្នានេះ នៅរាជធានីភ្នំពេញផងដែរ។
ចំពោះ វត្ថុតាង ដករហូតពីក្រុមក្មេងទំនើងទាំងនោះ រួមមាន ៖ ទូរស័ព្ទ ចំនួន ១២ គ្រឿង និងម៉ូតូ០៥គ្រឿង។ ហើយថា ករណីខាងលើ ការិយាល័យនគរបាលព្រហ្មទណ្ឌកម្រិតស្រាល កំពុងធ្វើការសួរនាំតាមនីតិវិធី។
ទោះជាបែបនេះក្តី អាណាព្យាបាល រស់នៅខេត្តព្រះសីហនុ និងភ្ញៀវទេសចរជាតិ ស្នើដល់ថ្នាក់ដឹកនាំរដ្ឋបាលខេត្តព្រះសីហនុ ក៏ដូចជាថ្នាក់ដឹកនាំ នៃទីបញ្ជាការដ្ឋានកងរាជអាវុធហត្ថខេត្តព្រះសីហនុ និងស្នងការដ្ឋាននគរបាលខេត្តព្រះសីហនុ ជាដើម ត្រូវពង្រឹងសកម្មភាពការងារបង្ក្រាបបទល្មើសផ្សេងៗ របស់ខ្លួន ឳ្យបានជាប្រចាំ ដោយកុំរង់ចាំ មានបទបញ្ជា របស់ ប្រមុខដឹកនាំរាជរដ្ឋាភិបាល ទើបនាំគ្នាដុតដុតជើង ចុះបង្ក្រាបបទល្មើសតាមក្រោយនោះ។
ពលរដ្ឋរស់នៅក្រុងព្រះសីហនុ បន្តថា កន្លងមក នៅក្នុងមូលដ្ឋាននានា ក្នុងមូលដ្ឋាននេះ តែងកើតមានបទល្មើសចោរលួចគាស់ផ្ទះ លួចទ្រព្យសម្បត្តិនៅពេលយប់ ចោរឆក់កាបូប ចោរលួចកាច់កម៉ូតូ បញ្ហាចរាចរជួញដូរ ផលិតគ្រឿងញៀន ឃាតកម្ម និងក្រុមជនជាតិចិនប្រើហិង្សា វាយកាប់ចាក់គ្នាជាដើម តែងកើតមានជាបន្តបន្ទាប់ ប៉ុន្តែកម្លាំងសមត្ថកិច្ចស្ថាប័នជំនាញ ហាក់ចុះបង្ក្រាបមិនបានទាន់ពេល និងមិនមានប្រសិទ្ធភាពនៅឡើយទេ៕ កម្ពុជាថ្ងៃនេះ
