សមត្ថកិច្ច ចាប់ខ្លួនក្រុមក្មេងពាល ប្រចាំភូមិដំណាក់ធំទី១ សង្កាត់ស្ទឹងមានជ័យ២ បានហើយ..

រាជធានីភ្នំពេញ ៖ សមត្ថកិច្ចនគរបាល ខណ្ឌមានជ័យ បានឲ្យដឹងថា ក្រុមក្មេងពាល ប្រដាប់ដោយដំបង និងកាំបិតធំ ប្រចាំភូមិដំណាក់ធំទី១ ស្ថិតក្នុងសង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ចំនួន ០៣នាក់ បានឃាត់ខ្លួនហើយ បន្ទាប់ពីក្រុមក្មេងពាលទាំងនេះ ធ្វើសកម្មភាពយ៉ាងសាហាវ វាយទៅលើគូទំនាស់ របស់ខ្លួន។

ជនសង្ស័យទាំង ០៣នាក់ ឈ្មោះ រុំលី សុខសាន្ត ភេទប្រុស អាយុ ២១ឆ្នាំ – ឈ្មោះ រុំលី សៃនី ភេទប្រុស អាយុ ២៤ឆ្នាំ និងឈ្មោះ ម៉េង សុខ ហេង ភេទប្រុស អាយុ ១៥ឆ្នាំ។

សមត្ថកិច្ច បន្តថា ជនសង្ស័យទាំង ០៣នាក់ រស់នៅភូមិដំណាក់ធំទី១ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។

សូមបញ្ជាក់ថា កាលពីវេលាម៉ោង ០៤ និង៣០នាទីទៀបភ្លឺ ឈានចូលថ្ងៃទី០៣ ខែមករា ឆ្នាំ២០២៣ មានក្មេងពាល ១ក្រុម រស់នៅភូមិដំណាក់ធំ១ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ បានដេញវាយគូទំនាស់យ៉ាងសាហាវ ហើយក៏ត្រូវថតបានដោយ កាំមេរ៉ាសុវត្ថិភាព ហើយត្រូវបានគេបង្ហោះចែករំលែក ពេញបណ្តាញសង្គមហ្វេសបុក។

ភ្លាមៗ បន្ទាប់ពីបែកធ្លាយវីដេអូឃ្លីបខាងលើនេះ សមត្ថកិច្ចនគរបាល ខណ្ឌមានជ័យ ក៏ចុះស្រាវជ្រាវឈានទៅឃាត់ជនសង្ស័យទាំង ០៣នាក់ និងបញ្ចូនខ្លួន មកកាន់អធិការដ្ឋាននគរបាលខណ្ឌមានជ័យ ដើម្បីសាកសួរ និងបន្តអនុវត្តតាមនីតិវិធីច្បាប់៕